Тыа ыалын олоҕун арыйар айымньылардаах

Дмитрий Наумов кинигэлэрин 2013 сыллаахха түбэһэн аахпытым. Тэттик кэпсээннэригэр тыа дьонун олоҕун наһаа сөпкө ойуулаабытын ааҕан баран сөхпүтүм. Тыа ыалын олоҕун билэрэ бэрт эбит диэн биһирээбитим. Биир чаҕылхай холобур баар - ол сылгылар кэпсэтиилэрэ. Сэниэ уонна кыаммат ыаллар сылгыларын сэһэргэһиилэрин нөҥүө дьон араас уобарастара, характердара арыллар, ыаллар ис тутуллара көстөр. «Кырдьык даҕаны оннук ээ”, - диэн сонньуйаҕын эбэтэр үөрэҕин.

Автор тыла өйдөнүмтүө, боростуой буолан ааҕааччыга тиийимтиэ. Кини суруйууларын темалара хатыламматтар, тэттик буоланнар ааҕан, бүтэрэн атыныгар көһөн иһэҕин, онон тартаран туран ааҕабын. Аахтаҕым аайы харахпар көстөн кэлэллэр, үгүс автордар кинигэлэрин аахтахха оннук харахпар сатаан ойууламматтар.

Дмитрий Федосеевиһы телевизорга көрөбүн, радиоҕа истэбин. Уустугу олус судургутук быһаарар, лоп-бааччы кэпсиир, онон авторы ордук чугастык ылынабын. Автор бу маннык өссө да интэриэһинэй, дьоҥҥо чугас кинигэлэрэ бэчээттэнэ турдуннар диэн баҕа санаабын этэбин.

 

Каратаева Мария Ивановна, Мукучутааҕы участковай балыыһа медсестрата.

Сэтинньи ый, 2016 сыл.