Ураты суоллаах биир дойдулаахпыт

18:31
31 июля 2018
Петр Максимов төрөөбүтэ 75 сааһыгар ананар

Максимов Петр Семенович – поэт, публицист, тылбаасчыт, ученай, философскай наука кандидата, Россия суруйааччыларын холбоһугун чилиэнэ (1995 сыл), Россия үрдүкү идэтийбит үөрэҕириитин бочуоттаах үлэһитэ.

Оҕолор сайыҥҥы күннэрин туһалаахтык атаараллар: үлэлииллэр, сынньаналлар, дьарыктаналлар. Социальнай партнердар бары тутуспутунан оҕо сайдарын туһугар кыһамньыбытын уурабыт.

От ыйын 18 күнүгэр биһиги биир дойдулаахпыт төрөөбүт күнэ. Бу күн киниэхэ анааммыт «Петр Максимов – бөлөһүөк-поэт, ученай» диэн тиэмэҕэ кыраайы үөрэтэр дьарык тэрийдибит. Истээччилэрбит «Дьулуур» лааҕыр иитиллээччилэрэ. Начальник Софронова В. А., иитээччи Семенова И. И. араас саастаах оҕолору арыаллаан илдьэ кэллилэр.

Ааҕар салааҕа бэрт сэргэх кэпсэтии буолла. Библиотекардар кинигэ обзорун оҥордубут, биир дойдулаахпыт кэрэхсэбиллээх олоҕуттан, үйэлээх үлэлэриттэн билиһиннэрдибит. Оҕолор ученай буоларын, элбэх научнай үлэлэрдээҕин сөҕө иһиттилэр. Хас да кинигэ автора буоларын, кыраайы үөрэтэрин, бөлөһүөк-поэт туох уратылааҕын буоларын биллилэр. Кини патриот поэт буоларын сэргээтилэр. «Кэбээйигэ курдук, манна» диэн сөбүлүүр хоһооммунан түмүктээтим.

Салҕыы бэрт дириҥ ис хоһоонноох түһүмэҕи Мукучу гимназиятын саха тылыгар уонна литературатыгар учуутала Евдокия Николаевна Васильева ыытта. Кини үөрэнээччитин С. С. ”Петр Максимов “Ыраас ымсыы” хомуурунньугар хатылааһыны туттуута” диэн дакылаатын сиһилии билиһиннэрдэ. Тылы үөрэтии, ырытыы үлэтин кэпсээтэ. Бу үлэнэн «Инникигэ хардыы» диэн региональнай таһымнаах научнай практическай конференцияҕа кыттан автор 1 миэстэҕэ тиксибитэ. Маннык ситиһии кэлэригэр салайааччы сүрүн оруолу ылара саарбаҕа суох. Библиотекардар төһө кыалларынан кинигэнэн, матырыйаалынан хааччыйабыт.

Түмүгэр бары хаартыскаҕа түстүбүт.

Ыытыллыбыт тэрээһин туһунан истэн автор махталын биир дьарыктааҕын Марк Петрович Григорьев нөҥүө тиэртэ.

 

Им Ия Николаевна,

Мукучу модельнай библиотекатын сэбиэдиссэйэ, общественнай корреспондент, лектор.

Хаартыскалар 10 №-х филиал фондатыттан ылылыннылар.