с 21:00 20.07 до 23:59 22.07 будут проводиться технические работы, возможны отключения Портала

Ситимнээх үлэ

11:05
09 июня 2018
РФ социальнай сулууспатын 100 сылыгар ананар Социальнай партнердарбыт

Биһиги нэһилиэкпитигэр социальнай үлэһит диэн аан бастаан нэһилиэк администрациятын иһинэн аһыллыбыта.

Манна дьиэ кэргэни, доруобуйаларынан хаарчахтаах дьону кытта үлэлииргэ биллэн турар өй-санаа, ис турук, билии-көрүү өттүнэн бэлэмнээх, амарах санаалаах, дьон кыһалҕатын өйдүүр, өйүүр дьон үлэлиир эйгэтэ. Биһиги нэһилиэккэ бу үлэҕэ аан бастаан бэйэтин кэмигэр республика, оройуон бастыҥ механизатора, социалистическай куоталаһыы хас да төгүллээх кыайыылааҕа Иван Семенович Гуляев үлэлээбитэ.

Иван Семенович хайа ыалга туох көмө наадатын: кимиэхэ муус, кимиэхэ мас аҕалыллыахтааҕын, хайа ыал ото бүтэн эрэрин ааҕа билэрэ, техника булан көмөлөһөрө. Ханнык да үлэҕэ ис сүрэҕиттэн ылсан туран үлэлиирэ. Иван Семенович биир ыалдьар боппуруоһа кыайтарбатах свалка буолара. Күһүн, саас төһө кыайарынан уматан, ыраастан иһэрэ. Урут да тэрилтэринэн дьон тохпут бөҕүн, балбааҕын ыраастааһын ыытылларын үрдүнэн ким ханна түбэһиэх тоҕор буолан сылтан сыл эбиллэн иһэрэ.

2013 сыллаахтан Ил Дархан туох баар нэһилиэнньэлээх пууннары тупсаран оҥорууга, уулуссалары ыраастааһыҥҥа, уотунан сырдатыыга, ол иһигэр свалкалары бэрээдэктээһиҥҥэ үп-харчы көрөн, бу тустаах дьаһаллары биэртэлээбитэ. Онон бары улуустарга, нэһилиэктэргэ бу үлэ сөргүтүллүбүтэ.

Социальнай үлэһиттэринэн Левина Марианна Ивановна, Ионова Зинаида Ивановна, Андросова Ксенья Афанасьевна үтүө суобастаахтык үлэлээбиттэрин дьон-сэргэ махтана саныыр. Кинилэр биһиги библиотекабыт эрэллээх ааҕааччылара, туох баар ыытыллар тэрээһиннэргэ барытыгар көхтөөхтүк кытталлара. Биһиги тэрилтэбит саамай алтыһан үлэлиир дьоммут – кинилэр. Доруобуйаларынан хаарчахтаах дьоннорго аналлаах, сэрии, тыыл ветераннарын чиэстээһин, суруйааччылар үбүлүөйдэригэр уо. д. а. библиотекабытыгар ыытыллар тэрээһиннэргэ барытыгар кытталлара: араас сахалыы остуол оонньууларын, саахымат, дуобат күрэхтэһиилэрин, быыстапкалары тэрийсэллэрэ.

Марианна Ивановна бэйэтэ иистэнэр, баайар буолан маастар-кылаастары ыытааччы. Кэнники кыл-сиэл оҥоһуктарга баҕалаахтарга дьарык ыытар.

Дьоҥҥо олус наадалаах үлэҕэ ылсан үлэлээбиттэрэ. Биирдиилээн дьону кытта кэпсэтэн, туох кыалларынан көмөлөһөллөрө.

2008 сыллаахтан бү үлэҕэ Прасковья Васильевна Андреева үлэлиир. Кини идэтинэн учуутал. Бастаан социальнай педагогунан киирбитэ. Прасковья Васильевна библиотекабыт көхтөөх ааҕааччыта. Туох баар ыытыллар тэрээһиннэрбитигэр барытыгар үөрэ-көтө кыттыһар. Прасковья Васильевнаны кытта дьиэҕэ олорор ааҕааччыларбытыгар сылдьабыт, кинигэ, хаһыат илдьэн биэрэбит. Прасковья Васильевна эрдэттэн ханнык ыалга барыахтааҕын этэр, оччоҕо туох кинигэҕэ наадыйалларынан көрөн бэлэмниибит.

Кырдьаҕастарга, доруобуйаларынан хаарчахтаах дьоҥҥо аналлаах тимуровскай көмөлөрү, тэрээһиннэри тиһигин быспакка ыытар. Ону таһынан бу дьон араас дөкүмүөннэрин толоруу, кимиэхэ эрэ коляска, ачыкы, араас эмп, күннээҕи туттар малы сакаастаан аҕалан биэрэр, эмтэнэллэригэр путевка кэпсэтэр. Ыалдьар киһи наадыйара элбэх буоллаҕа дии, онно барытыгар уоппуттаах, үлэтин ис хоһоонун үчүгэйдик өйдүүр, кыһамньылаах эрэ киһи кыайар үлэтэ дии саныыбын. Прасковья Васильевна бэйэтэ нэһилиэк общественнай үлэтигэр көхтөөхтүк кыттар, «Талбаана» хомусчуттар түмсүүлэрин чилиэнэ.

 

Иванова А. А.,

Мукучу модельнай библиотекатын библиотекара

 

Нэһилиэкпит социальнай өттүнэн харысхаллаах, хааччыллыылаах  буоларын туһугар кыһаллар-мүһэллэр киһибитинэн Андреева Прасковья Васильевна буолар. Танара оскуолатыгар социальнай педагогунан үлэлии сылдьыахпыттан ыкса алтыһан үлэлиибит. Уопсай сүбэнэн оҕоҕо, төрөппүттэригэр анаан моральнай, материальнай көмөлөрү оҥорооччубут, аһымал акциялары тэрийэн ыытааччыбыт, комиссия тэрийэн ыалларга сылдьааччыбыт, дөкүмүөннэри толорон тустаах тэрилтэлэргэ ыытааччыбыт.

Библиотека үлэтигэр оҕотуттан саҕалаан араас саастаах доруобуйаларынан хаарчахтаах ааҕааччылар хабыллар буоланнар бу сибээспитин өссө кэҥэтэн, дириҥэтэн биэрэбит. Араас тэрээһиннэри бииргэ торумнаан тэрийэбит: дьиэлэринэн сылдьабыт, кыраайы үөрэтэр интэриэһинэй матырыйааллары хомуйабыт, хаартыскаҕа түһэрэбит, декаданы ыытабыт, күрэхтэһиилэри тэрийэбит, кыттыһан көмө оҥоробут, сыл ахсын испииһэги чуолкайдаһабыт.

Кэбээйибит айар талааннаахтарын үлэлэрин сырдатабыт, саҥа кэлбит кинигэлэри, эбии мунньубут докуменнарбытын кытта билсэ тураллар.

Прасковья Васильевна ааҕааччы уонна үлэһит быһыытынан аахпыт айымньыларыгар санаатын суруйар, дьону бу уустук үлэҕэ көҕүлэһэр.

Ураты эйгэлээх ааҕааччыларбытын өйдүүрбүтүгэр, араас ньымаларын туттан таба тайанан тэрийэрбитигэр ситимнээхтик кыттыһан үлэлиирбит төһүү күүс буолар.

 

Им И.Н.,

Мукучу модельнай библиотекатын сэбиэдиссэйэ.

08.06.2018 сыл.

Хаартыскалар 10 № - дээх филиал фондатыттан ылылыннылар.

 

Прасковья Васильевна 1984 сыллаахха Бүлүү училищетын бүтэрэн баран тута Баҕадьаҕа үлэлии кэлбитэ, үс сыл оҕо саадыгар иитээччинэн, үс сыл олохтоох сэбиэккэ секретарынан үлэлээбитэ. Оччолорго Пашалыын бииргэ олорбуппут: бастаан оскуола биир өттүгэр, онтон ыал кыра дьиэтигэр. Наһаа үчүгэйдик тапсан олорбуппут, кэлин учуутал кыргыттар, атыттар олорсубуттара.

Паша барыга бары наһаа көхтөөх буолааччы, зонаҕа да үлэлиирбит, субботник бөҕөҕө бастакынан сылдьарбыт, фермаҕа араас үлэлэргэ, ыйы ыйдаан окко үлэлиирбит.

Паша талааннаах баҕайы, хомустуура, конферансье бастыҥа, үчүгэй куоластаах буолан ансамбылга ыллаһара. Ол кэмнэргэ бары да көхтөөх этилэр. Арыылаахтан тиийэ кэлэн культурнай олоххо кытталлара, Паша комсомол секретара этэ, оонньуу-көр бөҕө буолара, араас конкурстары тэрийэрбит. Фестиваль бөҕө буолара, сороҕор Арыылаахха тиийэ баран бэлэмнэнэрбит, ол быыһыгар субботниктарга кыттарбыт. Элбэхтик гастролга барарбыт, онно Прасковья конферансьелыыра, кыттара, оннук күүрээннээх кэмнэр этилэр.

Паша Аммаҕа эдьиийдэригэр барбыта, онно тиийэн бэйэтин идэтинэн алын кылаас учууталынан үлэлээбитэ. Уопсайа уон сыл Аммаҕа үлэлээбитэ, кэргэн тахсыбыта. Паша Аммаҕа да талаанын хаалларбатаҕа, ансамбылга ыллаабыта, сүрүн куолас буолара. Онон Пашаны, мин бииргэ алтыспыт киһибин наһаа үлэһит, культуралаах, эйэҕэс-сайаас, көхтөөх позициялаах, бастыҥ общественница диэн ахтан тураммын социальнай үлэһиттэрин күннэринэн эҕэрдэлиибин, ситиһиилэри баҕарабын.

 

Кычкина Галина Иннокентьевна,

культураҕа 33 сыл үлэлээбит (Баҕадьаҕа)

СР культуратын туйгуна.

08.06.2018 сыл.

Сайылык