Аһыныгас санаалаах буоларга үөрэтэр

Аһыныгас санаалаах буоларга үөрэтэр

14:53
17 Мая 2017
Кэбээйи улууһа төрүттэммитэ 80, Иван Иннокентьев төрөөбүтэ 60 сылларыгар ананар

Ааҕааччы санаата

Биһиги бииргэ алтыһан үлэлиир ааҕааччыбыт, нэһилиэк социальнай үлэһитэ Андреева П. В. санаатын үллэстэр. Доруобуйаларынан хаарчахтаах дьон туһунан автор айымньытын нөҥүө тыктаран көрөр.

Им И.Н.,

Мукучу модельнай библиотекатын сэбиэдиссэйэ бэчээккэ бэлэмнээтэ,

Иванова А. А., матырыйаалы хомуйда.

Иван Иннокентьев "Калека" кэпсээнэ студент уол киэһээҥҥи кэмиттэн саҕаланар. Кини сиэбигэр сарсыарда иэһээбит солкуобайыттан 30 харчы ордубутун уктан, тугу да гынара суох буолан уулусса устун оргууй хаама сылдьара кэпсэнэр.

Ол сылдьан иннигэр иһэр киһини көрө түһэр - киһи хаамара, төбөтүн хамсатара олуонатык көстөр. Киһи студеҥҥа чугаһаан кэлэн тохтуур уонна кирдээх, салҕалас илиитин утары уунар. Онтон суруйааччы бу калека киһини тас дьүһүнүн, таҥаһын, ааҕааччы хараҕар көстөн кэлэрдии чуолкайдык ойуулуур. Студент бытархайын биэримээри гынан баран бүтэһигэр бу киһини аһынан харчытын ытыһыгар ууран биэрэр уонна "Элбэх дьонноох сиргэ көрдөһүөҥ этэ", - диэн этэр.

"Мин эмиэ хаһан эрэ студент этим. Таҥараҕа итэҕэйбэтим, оттон билигин "Таҥара туһугар биэриҥ", - диэн көрдөһөбүн. Оттон таҥара суох! Баара буоллар мин буолбакка, атын киһи маннык уулуссаҕа сылдьыа этэ. Сүбэҥ иһин махтал, тохтобулга барбаппын, боруобалаабытым, хайдах эрэ саатабын. Уонна киһиттэн барытыттан көрдөөбөппүн ээ. Сотору таҥнары хайыспыт дьону өлөрөргө тиийэрим буолуо. Мин эмиэ киһибин ээ. Мин эмиэ ыраас таҥаһы кэтиэхпин баҕарабын", - диир уонна "Эн биһиэхэ кэлэ сылдьаар кырыыга кирпииччэ собуотун таһыгар, биһиги иккиэбит Николайдыын, кини атаҕа суох", - диэн эбэн этэн баран сууллан түһэн тартаран барар.

Суруйааччы бу айылҕа атаҕастаабыт киһитэ иһигэр кимнээҕэр ыраас дууһалаах, киһилии өйүн - санаатын ыһыктыбатах, аһыныгас, бэйэтин эрэ туһугар буолбакка, өссө атын киһи туһугар кыһалларын ааҕааччыга тиэрдэр.

Ааҕааччыны, дьону тас эрэ өттүнэн көрөн сыаналаабакка дьоҥҥо болҕомтолоох, аһыныгас санаалаах буоларга үөрэтэр.

Андреева Прасковья Васильевна

15.05.2017 сыл