Үтүө дьыаланы үйэтитии

Үтүө дьыаланы үйэтитии

09:16
12 Мая 2017
Тимофей Сметанин төрөөбүтэ 100 сылын көрсө, Кэбээйи улууһун төрүттэммитэ 80 сылыгар ананар.

"... Уруй буоллун, Улуу Олох!

Тускул буоллун, Дьоллоох Олох!"

1941 сыл, Тимофей Сметанин

Ыам ыйын 9 күнүгэр Улуу Кыайыы 72 сылыгар туһаайыллыбыт митинг сэрии толоонугар охтубуттарга аналлаах пааматынньыкка буолла.

Төлөннөөх сүрэхтээх буойун суруйааччы Тимофей Сметанин аатын сүгэр улуустааҕы киин библиотека уонна 10 № - дээх филиал аатыттан эҕэрдэ этилиннэ.

Тимофей Сметанин үтүө аата бу эргин нэһилиэктэри кытта эмиэ сибээстээх. Бу нэһилиэккэ чопчу буойун - учуутал, салайааччы Иван Левин аатын сүгэр Танара орто оскуолатын кытта сибээстээх. Икки Егоровичтар - Тимофей Егорович уонна Иван Егорович - биир көлүөнэ дьон буоллаллар. Иккиэн эт саастыылар, Кэбээйигэ күн сирин көрбүттэрэ, Кэбээйи 7 кылаастаах оскуолатыгар үөрэммиттэрэ, тутуспутунан студенныы барбыттара. Кэбээйибит оройуонуттан сэриигэ ыҥырыллыбыттара. Иккиэн төннөн кэлэн эйэлээх олоҕу уһансыбыттара. Хомойуох иһин, Тимофей Сметанин кылгас олоҕу олорбута, ол эрэн бу кыл түгэнэ кэмҥэ саха норуотугар уос номоххо сылдьар айымньылары бэлэхтээбитэ. Төһө да тус туспа дьылҕалаах буоллаллар икиэннэрин дойду иннигэр бэриниилээх буолуу, тирээн кэллэҕинэ төрөөбүт төрүт түөлбэ туһугар охсуһуу, Кыайыыга дьулуурдаах буолуу ситимнээбитэ.

Танара орто оскуолатын 8 кылааһын үөрэнээччилэрэ - уолаттара Тимофей Сметанин "Кырдьык иһин кыргыс" хоһоонун аахтылар. Модельнай библиотека социальнай партнербытын Самсонова Светлана Николаевнаны кытта дорҕоонноохтук ааҕыыны бэлэмнээтибит.

Митинг кэнниттэн тэрилтэлэр байыаннай ис хоһоонноох хор уонна үҥкүү күрэҕин икки ардыгар Улуу Кыайыы оһуокайын түһүлгэтин тэниттибит. Библиотека иһинэн үлэлиир "Өбүгэ ситимэ" фольклорнай түмсүү чилиэннэрэ Данил Николаев саҕалаата, салгыы Валентина Кондакова оһуокай тылын эттэ. Бу түһүлгэҕэ Октябрина Дьяконова аан бастакытын холонно, маҥнайгы сэмэй хардыытын оҥордо. Бары сэрии алдьархайын туһунан уонна Улуу Кыайыы, эйэлээх олох туһунан хоһуйдулар.

Быйылгы оһуокай түһүлгэтэ кэҥээбитэ кэрэхсэтэр, эрэли үөскэтэр. Кыттыбыт бар дьоммутугар махталбытын биллэрэбит. Өрүү да маннык көхтөөх буолуоххут, тус кылааккытын бу уустук тиэмэҕэ киллэриэххит диэн эрэнэбит.

Им И.Н., Мукучу модельнай библиотекатын сэбиэдиссэйэ,

"Өбүгэ ситимэ" фольклорнай түмсүү салайааччыта.