Сомоҕолоһорго дьулуһабыт

Сомоҕолоһорго дьулуһабыт

08:59
12 Мая 2017
М. К. Аммосов төрөөбүтэ 120, Т. Е. Сметанин төрөөбүтэ 100 сылын көрсө, Кэбээйи улууһун 80 сылларыгар ананар.

Муус устар 27 күнүгэр И. Е. Левин аатын сүгэр Танара орто оскуолатын актовай саалыгар 11 чааска икки үөрэх кыһатын - оскуола уонна гимназия - 5 - 11 кылаас үөрэнээччилэригэр анаан өрөгөйдөөх линейканы тэрийдибит.

Киирии тылы оскуола иитэр завуһа Афанасьева В. А. эттэ, линейка сыалын - соругун билиһиннэрдэ. Олохтоох дьаһалта администрациятын баһылыгын солбуйааччы Гоголев А. Н. бүгүҥҥү күн суолтатын, историческай личность М. К. Аммосов - Максим Чаҕылхай сүдү үлэтин, умнуллубат олоҕун сырдатта. Сахаларга "М. К. Аммосов - биһиги Лениммит" диэнинэн түмүктээтэ.

Модельнай библиотека сэбиэдиссэйэ литературнай монтаж ис тутулун, уолаттар ааҕыыларын пропагандалыыр, уол оҕону ааҕыыга сыһыарыы үлэ сүрүн көрүҥүн билиһиннэрдэ. Танара оскуолатын аатыттан саха тылын, литературатын учуутала, олохтоох автор Самсонова С. Н. салайан бэлэмнээбит үрдүкү сүһүөх кылаас уолаттара Саха сирин сайдыытын туһунан хоһоон аахтылар. Гимназия саха тылын, литературатын учуутала Васильева Е. Н. дьарыктыыр уолаттара буойун суруйааччы Т. Е. Сметанин "Саллаат сүрэҕэ" (1945 с.) диэн хоһоонун дорҕоонноохтук аахтылар. "Сирдээҕи дьолу билэбин диэн..." кынат тылларынан 9 уол монтаһы түмүктээтилэр.

Ветераннар сэбиэттэрин председателэ Николаев Д. Н. ыччаттарга туһаайан тыл эттэ. Араас көлүөнэ дьон оһуокайдаатыбыт. Оһуокайы Данил Никифорович иилээн - саҕалаан ыытта.           

Хаартыскаҕа түһэриигэ В. С., аппаратураҕа В. Г. үлэлээтилэр. Ити курдук социальнай партнерство тосхоло үлэҕэ, сайдыыга сирдиир. Сахабыт сирэ чэчирии сайдарын туһугар сомоҕолоһорго дьулуһабыт.

Уруй - Айхал !

Уруй Туску !

Им И. Н., Мукучу нэһилиэгин модельнай библиотекатын сэбиэдиссэйэ,

общественнай корреспондент, лектор